星夢郵輪の世界夢號2夜Seacation

登船地點係啟德郵輪碼頭，係九龍灣德福廣場有86號小巴直逹，相當方便。由於車站好多人，所以記得早D出門口啊! (搭的士都係唔錯既選擇)

大約6:30pm到逹郵輪碼頭，登船手續簡便，只需帶備香港身份證、而11歲以下既小童就要帶Passport及香港身份證、以作出入境之用。自助櫃位或一般櫃枱登記後，我地就成功拎到電子房咭(船咭)，然後係大堂準備上船。經過入境處出境手續&行李檢查後, 大約7:15pm 左右開始登船，單係碼頭玻璃窗望到隻船已經超興奮，好想快D上船玩!

比大家睇睇我果張電子船咭啦，每人都有一張，好緊要架，係房咭、又係信用咭(買野)、仲係上落船身份証等，記得好好保管隨身帶住啊 !

搭郵輪最好揀有露台既房，因為可以隨時出露台睇靚靚海景吹海風~ 今次我地4個人就book左兩間雙人露台房，一入房門就超興奮跳上床啦~ 房間有齊基本設備如熱水煲, 樽裝水, 茶, 毛巾, 拖鞋, 風筒...而浴室內亦都放左個人護理用品如洗頭水, 護髮素, 沐浴露, 牙刷...每日工作人員都會幫忙re-fill 護理用品架。而放係床上既船上活動表亦記錄左呢幾日既schedule，所以上到船真係要好好計劃時間點分配好。

放底行李後，我地就準備去免費自助餐廳食晚飯。𨋢口有齊清楚既指示，唔驚蕩失路。

船上有全天侯收費Wifi供應, 只要Download星夢郵輪Dream Cruises App, 接連Wifi，就可以如常上網。而網絡亦比我預期中穩定同快。 每個收費Wifi Plan可以同時Share比兩部手機用，價錢合理。去到差唔多食完飯，9點左右就開始啟航啦。雖然第一次搭郵輪，但我地幾乎無晃動既感覺，我諗怕暈船浪的朋友大可放心，即使往後兩日出左公海，隻船都好穩定，絕對唔洗食暈浪丸。

食完飯我地周圍行睇下有咩玩，行行下見到前面有部夾錢機，我地玩左幾次碰碰運氣~

另一邊見到星夢既賭埸，原來有三層架，樓下仲有表演唱歌添

6樓大堂有工作人員表演，同大家互動玩遊戲。另外附近亦有設置cafe 、 小小便利店等，萬一唔記得帶普通日用品 / 傷風感冒藥 / 零食等都方便隨時買到。我地玩到10點幾決定番房休息，明天早D起身玩盡佢~

第二日朝早5:30 起身睇日出，然後開展一整日既活動!

世界夢號有三間免費餐廳，其中一間係位於16樓既麗都自助餐廳，座位非常多，而且環海而坐，開揚舒適。但係用餐繁忙時間，人流好多，所以最好早一D黎到, 會比較容 易搵到窗邊座位。我既自助早餐如下 :

早餐食物款式眾多, 有中式有西式, 飽點, 點心, 穀物類, 粥品, 茶餅, 水果....而且供應不絕, Refill好快, 小朋友都好岩食! 飲品係自助形式, 咖啡, 奶茶, 果汁, 豆漿, 奶類...都有供應。至於晚餐的食物款式同樣豐富, 中式熱葷, 西式的扒類, 漢堡, 意粉, 還有印度咖喱, 燒味, 即斬脆皮燒肉, 東南亞粉麵等等...選擇十分多，甜品亦係另一個重點，花款好多，真係好飽~ 而且係船上可以無時無刻望住靚靚既移動海景食飯，真係人生一大享受啊~

經過17樓走廊，我地出去到日光甲板同大海陽光打招呼~

17樓甲板有除左有海上高空滑索、繩索場、攀岩牆、VR探索館、電子遊樂中心、小小夢想家天地外，仲有户外水上滑梯樂園。 *小小夢想家天地係專為兒童打造既趣味活動及遊戲中心，長期提供各式繽紛娛樂活動&遊戲。活動包括自創卡通片、手工藝術坊、觀賞電影、主題服裝及派對、各式益智遊戲、任天堂遊戲....另外仲可以應要求提供保姆&晚餐服務，不過需要收取額外費用。而小小夢想家天地既員工都受過專業訓練，拎到兒童保育資格，為 2–12 歲兒童開放，場地最多可以容納 40 位兒童並且不收費。于非繁忙航次，小朋友可以係專業看護既監督下，自由參與唔同類型既活動。

開頭以為12月既天氣會好凍，但原來當郵輪駛出公海後，體感氣温大約20度，加上天清氣朗，我地落左泳池游水。所以記得要帶泳衣、拖鞋上船呀! 而甲板上會有一系列豐富有趣既活動比旅客自由參加，例如係專為健康養生為主題: 名家太極工作坊、健康養生講座等活動，陶冶身心既粤劇、有趣既室外游戲，以及夜晚舉行既户外勁歌熱舞disco等。

19和20樓設滑水梯，睇落超刺激，我真係唔敢玩呀~ 鍾意刺激既朋友可以值得一試，幾秒就可以落到底玩完~

Wow! 海中心的景色美得不能以紙筆形容 ! 特別係陽光燦爛既日子真係好適合坐郵輪出海玩

游完水我地曬左陣太陽，入左旁邊既電子遊樂中心打機。之後亂打亂撞入左18樓既棕櫚閣, 透過玻璃窗見到套房(Suite)客人既尊屬泳池 & 甲板，睇落比起普通客人既設施高級好多。經了解後，發現原來套房(Suite)既客人可以享有特別禮遇，例如管家服務、優先上船、享用為套房客人而設既尊屬餐廳、泳池、賭埸等設施。哇 ! 下次上船玩一定要玩盡D book 套房啊 !

玩完水已經3點幾啦, 我地去7樓買左芒果糯米飯做tea, 補充體力 PS: 芒果糯米飯係下午 15:30 開始供應, 賣晒就冇架喇， 每買一個芒果送一份糯米飯 (可選擇唔要糯米飯都得)

食完芒果糯米飯，我地去左5樓既水晶生活·東方理療做SPA

我地試左招牌水療護理 : 反射按摩，係等待期間仲有新鮮水果食。按完摩就玩熱石座椅同埋水療按摩池，真係超級relax啊~

夜晚7:30pm 我地簡左8樓既自費餐廳 (海珍舫) 食海鮮，睇下幾豐富!

夜晚既活動比較大型， 所以我地食完晚餐就去睇show~ 今晚有刺激驚險既馬戲團表演 、勁歌熱舞表演、兒童劇場、攪笑既真人show等，岩晒一家大細睇。(記得提早一晚 book定，因為超多人入場架，經星夢apps / 去6樓counter book 都得)

睇完show我地決定去位於7樓、賣東南亞快餐既"藍湖美食" 嘆宵夜。原來 11pm 開始每碟宵夜賣港幣5蚊咋，識飲識食既我梗係唔會錯過啦，所以叫左勁多碟宵夜，有炸餃子、扎肉米粉、紅油抄手、煎菜肉包、豆漿........4個人夾埋都唔洗$100

第三日既早餐係7樓既免費中菜餐廳享用，呢度樓底高、古色古香、空間寛敞，而且同樣座擁無敵海景。餐廳提供套餐，早餐相當豐富又好味，叉燒包、水晶蝦餃、燒賣、奶黃包、蒸排骨、腸粉、粥.......質素比起一般酒樓過之而無不及。

離船前我地上左甲板影相留念，陽光普照既星期日令人不禁啍出藍藍天空高掛我的夢......今次2晚既Seacation真係好難忘，相信疫情過後一定可以再上郵輪玩既~ 下次希望去歐洲國家玩長D天數既郵輪行程啦~