當我第一次踏出何塞·馬蒂國際機場（夏灣拿國際機場）嘅時候，我嘅感覺就係「嘩，個機場係咁大㗎喇」，冇辦法啦，古巴由60年代開始被多國制裁，遊客大量減少，冇收入又點去擴建機場，直至2014年12月開始同鄰國關係有改善，遊客開始蜂擁而至，希望有一日會有新機場啦！

去古巴嘅遊客會因為唔同嘅年齡界別會有唔同嘅感受，大約分為80前同80後出世兩類。80年前，感受過未開放時候嘅中國，對於古巴嘅現況比較了解同容易接受，繼而懷緬過去，好有似曾相識嘅感覺，好似返咗70年代嘅廣州一樣，呢個亦都係佢可愛之處。 至於80年後出世嘅，感覺自不然冇咁強烈，甚至覺得比較落後(因為周圍都冇Wi-Fi），故未能體會古巴迷人之處！

到達古巴第一個印象，就是周圍都好多古董車，這個亦都是旅遊古巴必做的一件事，黃昏時分，坐於開篷古董車沿着海濱大道漫遊新、舊夏灣拿之景色，尤其是我哋亞洲遊客仲唔係咁多，更引起不少好奇目光，熱情的古巴人不斷向遊客揮手示好，喺紅綠燈停車時更希望同遊客合照作紀念已經好滿足，亦都冇問我哋攞小費，可見得古巴人嘅真性情（但旅客仍然需要討價還價喎！）

鍾意飲酒嘅我，嚟到呢個國家真係又愛又恨，愛⋯⋯你可以天天餐餐都飲酒，恨⋯⋯就是天天飲嘅大多數係古巴出產嘅「土炮」，例如冧酒或稱蘭姆酒 （Rum)，酒精含量有成40度，喺咁多個選擇當中，當然最出名嘅就係Havana Club ，甚至有佢哋自己嘅博物館，參觀嘅時候仲會俾你試飲。

但用Rum酒做嘅Cocktail就更加世界知名，例如有周杰倫嘅新歌⋯⋯Mojito，就係來自古巴，仲有Pina Colada、Daiquiri⋯⋯。當你去到餐廳食飯，點完餐之後，侍應就會送上一杯冇酒精嘅Mojito俾你，而手上就揸住一支Rum酒，只要你一個指示，佢就開始加入你杯Mojito中，直至你叫停為止，只要客人開心，佢哋就毫不吝嗇咁斟俾你⋯⋯實在太開心啦！

有一次我去到一個休息站，見到好多人都捧住個菠蘿喺度飲，當時係早上10點左右，我諗呢個可能係佢哋嘅早餐菠蘿特飲，我又買過嚟試吓，原來就係另外一個古巴Cocktail~ Pina Colada，當然亦有無限量嘅Rum酒啦，飲完之後嗰日心情特別好⋯⋯哈哈，好彩冇醉！ 除此之外亦有人加入可樂一齊飲，你會問：古巴同美國關係唔好，點會有可樂呀？當然有啦，「土炮可樂」吖嘛！

雖然古巴仍然係一個共產國家，仲有好多嘢需要改善同進步，但亦都係因為呢個原因，先可以感受到最「真」嘅一面，揀得去呢度玩嘅，就係希望得到另一種旅遊經驗，滿足旅客嘅另類要求！

所以點解唔好去古巴⋯⋯ ⋯⋯因為你會感受到另外一種其他國家比唔到你嘅旅遊經驗，令你更加想了解佢！